Schools That Rock vra ‘n paar vrae aan Louisa Swart, Hoofdogter van Hoërskool Oudtshoorn.
Vraag: Hoe sien jy die invloed van die Covid19 virus op ons land?
Die Covid 19 virus het nie net ‘n impak op ons land nie, maar oor die hele wêreld. Met die lockdown is daar enorme druk vir Suid Afrika se ekonomiese en sosio omstandighede, asook massiewe uitdagings wat gepaard gaan. Ek is wel trots op ons president wat so vinnig reageer het om hierdie land van ons se mense te beveilig. Ja, daar is ongelukkig ‘n prys: lewe sodat ons weer kan werk of werk en ons kan dalk nie meer lank lewe nie. Die ongeluk van hierdie virus is dat geen magtige land gereed was of is vir die uitdaging wat gepaard gaan nie. Die realiteit is dat duisende mense werkloos kan wees en dit gaan gepaard met armoede, geweld ens.
Vraag: Dink jy dat die virus ‘n invloed op toekomstige onderwys gaan hê? Gaan skole anders kyk na onderwys?
Ja en nee, want planne moet gemaak word vir die res van 2020 wat verseker meer met verskeie soorte aanlyn media/programme (tegnologie) te doen het. Meeste skole in die land was nie voorbereid vir sulke ekstreme stappe nie, maar weereens is bewys dat die mensdom egter ‘n besonderse spesie is. Hierdie tipe skoolaanbieding het wel bitter baie uitdagings en ek dink die grootste is die toeganklikheid tot wi-fi/data. Vir die toekoms dink ek dat skole steeds voort sal gaan met die gewone tradisionele manier, nl. Skoolgebou, onderwysers, klaskamers, skooluniforms, sportbyeenkomste, sing van skoollied en die stem en skoolgees. Dit sal egter slegs kan voortgaan indien daar ‘n tipe entstof gevind kan word om hierdie pandemie te beveg. Ons vertrou dat alles weer sal regkom, maar is ook daarvan bewus dat alles nie meer dieselfde sal wees nie.
Vraag: Hoe/wat beplan jy om steeds jou doelwit vir jou laaste jaar op skool te bereik?
Hmmmm, my doelwitte was nie net vir studies nie, wat natuurlik prioriteit is, maar ek het soveel uitgesien saam met my sportfamilie, my netbalspan, ons hokkiebokkies/seuns, die sing-songs langs die rugbyveld, die krete, interskole, gesonde kompetisie, die skoenlapper in jou maag voor die wedstryd begin, maar dis nou ‘n 2019 gedagte. Amper soos toe ons die 2019 Wêreldbeker weer omhoog gehou het, jy sit daai gevoel maar op “repeat”!!!
Wel, sodra jy besef dat hierdie nie ‘n eenman toneelstuk is nie en die res van die land se matrieks dra dieselfde sentiment, dalk net met sy eie passies, raak mens heelwat kalmer en besef jy kan jou alles nou in akademie stort, dalk ‘n voorreg wat ons voorgangers nie gehad het nie. Hierdie is nogal ‘n groot faktor wat ek gebruik om positief te bly en natuurlik die feit dat ek nie die graad wil herhaal nie. Ek staan elke dag op met die wete dat ek self verantwoordelik is vir my laaste skooljaar, sodat ek die beste begin kan bepaal vir die eerste jaar van my toekoms. Hierdie is my kans om nog harder te werk vir nog beter punte. Oja, die familie in die huis kan my soms mal maak, maar ek sien hulle as die stout kinders in die klas!!!! Net ‘n grappie!!!
Vraag: Wat beplan jy vir jou toekoms? Loopbaan?
Ek beplan om Wingerd en Wynkunde te studeer na my matriekjaar. Die tersiêre instansies wat dit aanbied is Universiteit Stellenbosch, Elsenburg en Wellington. Na my studies beoog ek om verdere verrykings oorsee te doen en hopenlik in my eie land te woon en werk. Ek is nogal opgewonde, maar ek dink my ma en haar vriendinne is die meeste opgewonde, hulle het klaar aangebied om die proefkonyne te wees…..
Ek wil baie graag vir almal in hierdie tyd baie seëninge toewens, ons almal “battle” met hierdie virus op verskillende maniere, maar vir my gesin, die familie, ons Oudtshoorn gemeenskap, die hele land se skoolkinders en matrieks, my skool met al sy kosbare onderwysers en veral my AWESOME matriekklas van 2020, ons gaan weereens hierdie situasie rock!!! Julle is LEGENDS!!! #missyouall#Staysafe#stayathome
