Schools That Rock vra ‘n paar vrae aan Dylan Keyser, Hoofseun van Hoërskool Jan van Riebeeck, Kaapstad.
Vraag: Hoe sien jy die invloed van die Covid19 virus op ons land?
Ek glo dat die Covid19 virus hoofsaaklik ‘n groot negatiewe impak het op SA , veral in ‘n ekonomiese perspektief. Die ekonoom, Mike Schussler, sê dat 86 mense in die afgelope vyf weke dood is aan Covid 19. Die land se ekonomie het al R500 miljard verloor, so elke sterfte kos die land R5,8 miljard. Ons land se ekonomie was reeds nie in ‘n goeie toestand nie, maar ek glo dat dit weer jare sal neem net om ons ekonomie terug te laat keer na daardie toestand waarin dit was voor Covid 19. Baie mense het hul werke verloor, baie mense se inkomstes is drasties verminder en baie besighede moes al toe maak. Dit is die eerste keer wat ons iets soos hierdie beleef- die eerste keer wat ons basiese reg tot vryheid van beweging weggeneem is om ons te beskerm.
Vraag: Dink jy dat die virus ‘n invloed op toekomstige onderwys gaan hê? Gaan skole anders kyk na onderwys?
Ek glo dat die virus beslis ‘n invloed op toekomstige onderwys sal hê. Ek glo dat skole van nou af meer gereed sal wees indien iets soortgelyk sou gebeur en dat skole meer daarop sal fokus om leerders te onderig oor hoe om aanlyn skool te kan gaan. Ek weet dat my skool, Jan van Riebeeck, tydens hierdie inperking ‘n hele databasis geskep het vir al ons leerders en vir ons, ons eie e-pos adresse geskep het sodat almal Google Classroom kan gebruik. Ons sal dit kan gebruik indien ons ooit weer nie in staat sal kan wees om skool toe te gaan nie. Ek glo ook dat toekomstige leerders beslis oor hierdie virus gaan moet leer en dat dit deel sal word van die nuwe geskiedenis, ekonomie en biologie handboeke. Ek voel ook dat skole meer klem sal plaas op die belangrikheid van basiese higiëne.
Vraag: Hoe/wat beplan jy om steeds jou doelwit vir jou laaste jaar op skool te bereik?
Ek wil graag aan die einde van die jaar my sewe onderskeidings behaal en daarvoor werk ek maar net elke dag hard en verseker dat ek nie agter raak met my werk nie. Ek geniet dit eintlik vreeslik baie om alleen by die huis te werk en om vir myself die werk te verduidelik en om op te som terwyl ek deur die werk gaan- dit voel soms beter en meer effektief as wat ek in die klas sit, maar nie altyd mooi en aandagtig luister nie. My onderwysers stuur ook videos en ekstra notas wat beslis ook help indien ek sukkel om iets vir myself te verduidelik. Ek hou elke dag my brein aan die gang en veral nou tydens die inperking, geniet ek dit om als op my eie tyd te doen, want dit vat darem ‘n groot mate van die druk, wat soms deur skool veroorsaak word, weg.
Vraag: Wat beplan jy vir jou toekoms? Loopbaan?
Ek is van plan om volgende jaar Aktuariële Wetenskap te swot by Stellenbosh en sal graag eendag wil werk in die beleggings- of bank industrie.
Eie kommentaar:
Ek glo dat dit baie belangrik is dat ons positief moet probeer bly tydens hierdie tyd, want om negatief te word sal net die situasie slegter maak. Ons moet fokus op die goeie dinge, veral as jy bevoorreg genoeg is om veilig onder ‘n dak te bly, saam met liefdevolle mense woon en gesond is. Moet nie hierdie tyd mors nie, leerders moet aanhou werk en hulself verryk en die volwassenes moet begin kreatief dink aan maniere om besig te bly. Moet nie moed verloor nie! Laastens wil ek net almal aanmoedig om aan soveel dinge deel te neem as wat jy kan en waarvan jy hou, want ek het besef dat ek waarskynlik nie weer aan my aktiwiteite soos debat, landloop, redenaars ens. sal kan deelneem op hoërskool nie. Ek het dit beslis as vanselfsprekend aanvaar en ek wil almal aanmoedig om elke geleentheid aan te gryp sodra ons weer kan!