schoolsthatrock
Vyfkamp Wêreldkampioenskap. HTS Drostdy-leerder gekies vir SA-vyfkampspan by die Vyfkamp Wêreldkampioenskap.
Renso de Wet, ’n talentvolle Graad 10-leerder van HTS Drostdy in Worcester, het ’n uitsonderlike prestasie behaal deur opgeneem te word in die o.17-Suid-Afrikaanse vyfkampspan. Hierdie prestasie plaas hom onder die land se top jong vyfkampatlete, wat Suid-Afrika vanaf 17 tot 20 Julie tydens die UIPM Wêreldkampioenskap in Johannesburg gaan verteenwoordig.
Moderne vyfkamp is ’n veeleisende multi-dissipline sport wat bestaan uit vyf uitdagende items: swem, hardloop, skerm, laserpistool-skiet en ’n hindernisbaan. Dié sport ontwikkel nie net ’n atleet se fisieke vermoëns nie, maar vereis ook strategie, fokus en vasberadenheid. Die sport word internasionaal gereguleer deur die Union Internationale de Pentathlon Moderne (UIPM).
Renso se keuring tot die nasionale span getuig van sy toewyding, harde werk en sportiewe uitnemendheid. Die Drostdy-skoolgemeenskap is uiters trots op sy prestasie, en ons wens hom alle sterkte toe met die finale voorbereidings en kompetisie. Mag sy deelname nie net tot persoonlike groei lei nie, maar ook ander jong atlete inspireer om groot te droom.
Lees meer skolenuus hier: https://schoolsthatrock.co.za/
Foto verskaf
Become a Sponsor
