Waterpolo - Afrikaanse Hoër Meisieskool Pretoria

Waterpolo. Die afgelope naweek het die Affies-dogters se waterpolo span hul skool met trots verteenwoordig tydens die Inspired Cup by Reddam Bedfordview. Hierdie toernooi het die span ’n waardevolle geleentheid gebied om hul vaardighede en spanwerk te toets. Die span het teen van die land se top spanne gespeel. AHMP se span het slegs ’n jaar se ervaring in waterpolo. Met moed en deursettingsvermoë het hulle elke wedstryd aangepak en hul beste gelewer.

In die groepfase het die span dapper weerstand gebied teen sterk teenstanders. Hulle het ’n nederlaag van 3-10 gely teen die naaswenners, Woodridge, maar het met vasberadenheid te staan gekom teen spanne soos St Mary’s Kloof, Parktown, Reddam Helderfontein en Roedean. Hulle het ook ’n gelykopuitslag van 5-5 behaal teen St Peters College.

In die uitspeelrondtes het die dogters egter hul ware karakter getoon. Hulle het St Mary’s Waverley met ’n oortuigende telling van 8-4 geklop en op die laaste dag van die toernooi het hulle St Peters College met ’n oorweldigende 9-1 verslaan. Dit is slegs ’n dag nadat hulle teen dié span gelykop gespeel het. Hierdie uitslae weerspieël die span se groei, vasberadenheid en harde werk. Die span het 9de uit 13 spanne geëindig.

Die Affies-waterpolospan is inspirerend en vasberade om volgende jaar die toernooi te wen en ’n plek in die St Mary’s Waverley , die grootste waterpolobyeenkoms in die land, te verseker.