schoolsthatrock
Skitterende Tennisster – Saskia van Loggerenberg van Laerskool Stulting, Humansdorp is ’n uitstaande jong, skitterende tennisster. Sy het die afgelope seisoen geskitter op die tennisbaan.
Saskia het die afgelope seisoen gewys dat harde werk, talent en deursettingsvermoë werklik vrugte afwerp. Sy het aan verskeie nasionale en streekstoernooie deelgeneem waar sy met haar indrukwekkende spel telkens haar mededingers laat kopkrap het.
By die American Express Free State Super 8 Toernooi in Bloemfontein het hierdie Tennisster geskitter tussen 64 deelnemers. Sy behaal ‘n puik prestasie en eindig in die 29ste plek. ’n Prestasie wat wys hoe mededingend sy in groter velde is. Sy het ook haar staal gewys in die American Express Junior Nationals o/12 Toernooi, ook in Bloemfontein. Daar eindig sy 13de tussen van die land se beste jong spelers.
Die Suid-Kaap het ook vir hierdie skitterende tennisster geglimlag toe sy aan die Eden Tecnifibre Mini 3 o/12 Toernooi in George deelgeneem het. Hier het sy met selfvertroue die 1ste plek in enkelspel en die 3de plek in dubbelspel verower. By die Eden Tecnifibre Grand Prix, ook in George, het sy weer onder die top tien geëindig, met ‘n 8ste plek in enkels en nog ’n 3de plek in dubbels.
Saskia het haar reeks glansprestasies afgesluit by die Eastern Cape NMB Mini 3 Toernooi in Gqeberha, waar sy tweede in enkelspel geëindig het en weer derde in dubbels. Hierdie volgehoue hoë vlak van prestasie oor verskeie toernooie en provinsies spreek boekdele van haar toewyding aan die sport.
Veels geluk, Saskia! Ons sien uit na nog vele oorwinnings op en buite die tennisbaan.
Meer skolenuus: https://schoolsthatrock.co.za/
Foto voorsien
Become a Sponsor
