schoolsthatrock
Mediumskole Netballiga. 🏐 HSDA Arende vlieg hoog in die 2025 Mediumskole-netballiga!
Hoërskool De Aar het vanjaar ’n kragtige indruk gemaak in die mediumskole-netballiga. Al vier spanne van Hoërskool De Aar wat ingeskryf het, het hul plek in die kwart-eindrondes verdien! Die aksie het op Saterdag, 9 Augustus, in Kimberley afgespeel, en die Arende het hul vlerke behoorlik gesprei.
O.14-span: Van stadig na skitterend!
Die jong Arende het teen Hoërskool Martin Oosthuizen afgeskop en aanvanklik gesukkel om momentum te kry. Maar toe kom die vuur! Hulle het hul spel opgeskerp, die semi-finaal gehaal, en met vasberadenheid teen Hoërskool Douglas gestaan. Al het die wen hulle ontglip, het hulle hulself hergroepeer en in die kleinskole-finaal teen Postmasburg met ‘flair’ en fokus as wenners uitgestap. 🏆
O.15-span: Dapper en vasberade
Die o.15’s het hul wedstryd teen Hoërskool Martin Oosthuizen met moed aangepak. Foute het hul spel gekniehalter, en hulle moes die knie buig met ’n telling van 10–15. Hul gees en deursettingsvermoë was egter onmiskenbaar.
O.17-span: Stratege en stryders
Direk in die semi-finaal het hulle Hoërskool Postmasburg die stryd aangesê. Hul samespel het met tye geblink. Ondanks die fisiese uitdaging het hulle met 12–10 as oorwinnaars uitgestap. In die finaal teen Daniëlskuil het die span hard geveg, maar die opponente se lengte en druk het hul aanval geknou. ’n Tweede plek in die liga is egter ’n prestasie om op trots te wees!
Eerstespan: Hartklop en helde
In ’n senutergende kragmeting teen Curro Kathu het die eerstespan hul staal gewys, selfs sonder hul staatmaker-senter. Hul aanpasbaarheid, vasbyt en spanwerk het die toeskouers op die punt van hul stoele gehou. Die eindtelling? ’n Hartverskeurende verlies met net 1 doel. Hierdie meisies se karakter het die dag gewen.
🎉 Die 2025-seisoen het gewys dat HSDA nie net netbal speel nie – hulle leef dit! Van vaardigheid tot vasberadenheid, van nederlaag tot triomf – ons Arende het gewys dat hulle nie net op die baan uitblink nie, maar ook in gees, karakter en spanwerk.
HSDA Arende – voorwaar!
Lees meer skolenuus hier: https://schoolsthatrock.co.za/
Foto verskaf
Sponsored By
