schoolsthatrock
Môreson Myl. Kwaggas blink uit by Môreson Myl 🌊🏊♀️
Op Saterdag, 21 Februarie 2026, het twee leerders van Hoërskool Outeniqua, George – Karli Karstens en Johané Burger – met trots deelgeneem aan die jaarlikse Môreson Myl. Dit is aangebied by Island Lake in Wilderness.
Hierdie oopwaterkompetisie oor 1,6 km het vanjaar sy grootste deelname nóg beleef. 208 Swemmers van alle ouderdomme wat die uitdaging aangepak het. Die geleentheid is vanjaar vir die vyfde keer aangebied. Dit dien as fondsinsameling vir die Môreson Kinder- en Jeugsorg Sentrum in George. Dit is ‘n instelling wat ‘n groot verskil maak in die lewens van kinders en jongmense in nood.
Sterk vertonings deur Karstens en Burger
Karli Karstens het die myl in ‘n tyd van 00:35.07 voltooi. Daarmee het sy ‘n indrukwekkende 6de plek in haar ouderdomsgroep (13 en onder) behaal. Sy het ook 19de onder die 114 vroulike deelnemers geëindig en 53ste algeheel.
Johané Burger het kort daarna die eindpunt bereik met ‘n tyd van 00:37.29. Dit het aan haar ‘n 8ste plek in die ouderdomsgroep besorg. Sy het 30ste onder die vroue en 77ste algeheel geëindig.
Gemeenskapsgees en inspirasie
Die Môreson Myl is nie net ‘n toets van uithouvermoë nie. Dit is ook ‘n simbool van solidariteit en ondersteuning vir kinders in nood. Deur hul deelname het Karstens en Burger gewys dat jong sportlui nie net vir prestasie swem nie. Dit is ook om ‘n tasbare verskil in hul gemeenskap te maak.
Hoërskool Outeniqua het hierdie twee meisies geloof vir hul toewyding en prestasie. “Welgedaan, Kwaggas! Julle is ‘n inspirasie vir die skool en die gemeenskap,” het ‘n woordvoerder gesê.
Lees meer uitstaande skolenuus hier:https://schoolsthatrock.co.za/
Foto verskaf
Become a Sponsor
