schoolsthatrock
Knysna Woud Halfmarathon – Mira Rossouw, is ’n graad 12-leerder van Hoër Meisieskool Oranje. Sy het die afgelope Saterdag die Knysna woud behoorlik laat bewe met haar pas! Sy behaal die eerste plek vir vroue in die junior-afdeling (14–19 jaar) van die ikoniese Knysna Woud-halfmarathon. Mira het die uitdagende 21.1 kilometer voltooi in ’n indrukwekkende tyd van 1:41:19. Dit is nie ’n prestasie wat net toewyding en talent weerspieël nie, maar ook ware deursettingsvermoë.
Meer as 6 000 hardlopers van alle ouderdomme en geslagte het deelgeneem aan dié geliefde wedloop. Hierdie Knysna Woud Halfmarathon is bekend vir sy asemrowende roetes deur die digte Knysna-woud en sy feestelike gees.
Wat Mira se prestasie selfs meer besonder maak, is haar reis terug na die wenpaal. Ná ’n voetoperasie vroeër vanjaar was sy vir vier maande beperk in ’n maanstewel. Sy kon in April stadig haar oefenroetine hervat. Nou, na skaars ’n paar maande later, daag sy nie net op nie, sy oorheers ook die wedloop, ten spyte van haar besering.
Mira se storie is ’n getuienis van volharding en hoop, asook die ongelooflike dinge wat moontlik is wanneer jy weier om op te gee. Ons sien uit na nog baie hoogtepunte van hierdie jong atleet in die toekoms!
Meer skolenuus: https://schoolsthatrock.co.za
Foto voorsien
Become a Sponsor
