2019 is ‘n besondere jaar vir EHS se kultuur en dit het baie duidelik na vore gekom in die stukke wat EHS voorberei het vir die ATKV Tienertoneel.
Vroeg vanjaar was die belangstelling vir die Tienertoneel reeds groot en meer as 70 leerders het opgedaag vir die oudisies. Uit die ongelooflike talent wat die leerders ten toon gestel het, kon die Erries daarin slaag om vier produksies die lig te laat sien.
Al vier die produksies het tydens die jaarlikse ATKV Tienertoneel Ermelo-streeksfees die Erries se naam hoog gehou. Dié fees het vanaf Dinsdag 30 Julie tot Vrydag 2 Augustus plaasgevind met die streeksfinaal wat die daaropvolgende Saterdag, 3 Augustus, plaasgevind het.
Op Dinsdag neem twee toneelstukke van EHS deel: “Sonskynhotel” en “Pajama Vrydag.” Sonskynhotel is deur me. Gerda van Zyl geregisseur. Dit is ‘n klug wat handel oor vreemde en eienaardige gebeure by die “Sonskynhotel”, met karakters wat onder andere gesprekke voer met denkbeeldige kollegas en skedels, kinders wat ‘n “inverse wiskunde grafiek” wil word wanneer hulle groot is en ‘n reeksmoordenaar wat mense om die bos probeer lei. In die toneelstuk ontvang Luhan Meyer, Robbie Brown en Desmond Slabberts almal ‘n brons sertifikaat vir hul spel.
Die volgende stuk is “Pajama Vrydag” en hier was me. Lizanne Dippenaar die regisseur. Die komiese stuk het beide die gehoor en die beoordelaars laat skaterlag en die jong toneelgeselskap het hulself besonder goed van hul taak gekwyt. Die storie handel oor ‘n skoolhoof wat ‘n behoefte het aan ‘n verhouding en sy sekretaresse wat oorywerig is om hom te help.
Dié affêre laat baie vrae ontstaan by die skoolleerders waaronder die skoolhoof se seun en die sekretaresse se dogter ook val. Uiteindelik is alles net ‘n deurmekaarspul wat vining uitgesorteer moet word tydens die skool se jaarlikse “Pajama Vrydag” en dié se Pajama-piekniek. Hierdie stuk verower ‘n brons toekenning vir ensemble, asook ses brons en twee silwer individuele sertifikate. Danie van Rooyen, Heubie van der Walt, Mienke Cloete, Johnke Prinsloo en Vosjan Grey ontvang almal ‘n brons sertifikaat vir spel en Gerzanda Fourie ‘n brons sertifikaat as verhoogbestuurder. Die silwer sertifikate gaan aan Theané Arnoldi en GJ Swart vir spel.
“Aktrise, Wiese, Verkniese” is ‘n eenvrouproduksie en Gizelle Wilkens, graad 11-leerder, is braaf genoeg om dié stuk alleen op te voer! Dit handel oor ‘n aktrise wat, al probeer sy wat, nie inpas by die wêreld van die televisie-sterre nie. Die verwerping wat sy keer op keer op keer tydens oudisies ervaar, laat haar gemoed swaar. Gizelle doen ‘n uitstekende werk om die moedelose aktrise ‘n werklikheid te maak op die verhoog.
Op Vrydag het die laaste stuk van Hoërskool Ermelo opgetree onder leiding van me. Mariaan Rust as regisseur. “Hy” is ‘n donker drama wat oor die onaangename tema van verkragting handel. In die karakter se kinderdae het sy ‘n voorval beleef wat altyd by haar sal spook. Gedurende haar hoërskoolloopbaan ervaar sy ‘n soortgelyke voorval wat haar breek.
Dit neem haar menswees weg, dryf haar tot ‘n daad wat haar op die einde haar lewe kos en dit alles omdat sy twaalf jaar terug verkrag is. Mignon Ferreira ontvang ‘n brons sertifikaat vir haar spel in “Hy” en me. Mariaan Rust ontvang ‘n brons sertifikaat vir haar regie.
Uit die 17 stukke wat aan die fees deelgeneem het, is EHS se “Pajama Vrydag” een van die stukke wat deurdring na die finaal wat op Saterdagaand plaasgevind het. Na nog ‘n uitstekende optrede ontvang die Erries ‘n vierde plek in die streekskompetisie naas Hoërskool Menlopark, Curro Nelspruit en Hoërskool Louis Trichardt.
Baie geluk en dankie aan elkeen wat deel was van die onderskeie produksies, ook dié wat agter die skerms gewerk het.
Hoërskool Ermelo is trots om met die kenmerkende Errie-passie en -deursettingsvermoë die kultuur ‘n geweldige hupstoot gee.
Foto bo: Die groep Tienertoneel-leerders van EHS