Links me Shareen Rademeyer en regs me. Anna-Marie van Heerden.
2019 Eindig nie sonder ‘n traan of twee in de Erries se oë nie. Hoërskool Ermelo groet aan die einde van die jaar twee staatmakers: me. Anna-Marie van Heerden en me. Shareen Rademeyer.
Om totsiens te sê, is nie maklik nie, veral nie vir ‘n persoon wat 43 jaar by Nelstehuis en Hoërskool Ermelo betrokke was nie. Vir juffrou Anna-Marie van Heerden het dit tyd geword om haar hartshuis se deure toe te maak en die aftree-deure oop te maak. Anna-Marie van Heerden is sedert 1977 ‘n Errie in murg en been.
Sy is die spreekwoordelike ‘klein botteltjie, groot gif’. Vanaf die intrapslag het sy betrokke geraak by Nelstehuis en was vir baie jare hulle geliefde koshuismoeder. Sy het geen moeite ontsien om kinders te versorg en te bederf nie. Sy het hulle menigmale rondgery en tydens Groentjies het sy in die aande gery om vir hulle roomys te koop wanneer die spanning hoog geloop het. Sy laat ‘n groot leemte in Nelstehuis en al die oud-Nelsies sal haar onthou as ‘n dame met omgee en finesse.
Anna-Marie het grootliks bygedra tot die sukses van die Erries se dogtershokkie en is al verskeie kere bekroon met die Noordvaal-trofee. Sport is haar passie en deur die jare het sy menige dogter gemotiveer tot groot hoogtes.
Op akademiese vlak het Anna-Marie meer as haar beste gegee. Deur die jare het sy leerders geïnspireer om ‘n liefde vir Afrikaans te ontwikkel. Haar sagte aanslag en haar omgee-hart maak van haar ‘n onderwyseres wie se nommer vier-skoene moeilik gevul sal word. Sy het nooit haar humeur in die klaskamer verloor nie en al die leerders oor dieselfde kam geskeer. Die Afrikaanse departement was bevoorreg om by jou te leer van harde werk, deursettingsvermoë en toewyding.
Anna-Marie, jy en jou Skotse terriërs – Trixie, Quinta, Bonny en Lilly – sal altyd onlosmaaklik deel van die EHS bly.
Shareen Rademeyer was vir die laaste vyf jaar deel van die Errie-familie. Sy was vir almal ‘n voorbeeld met haar uitsonderlike vakkennis en pligsgetrouheid. Sy het nuwe perspektief gegee aan English Home Language met haar Poetry Club (vir Afrikaanse en Engelse leerders), asook die inisiatief met die SALA Public Speaking deelname met EHS-leerders. Shareen se kreatiwiteit en positiewe gesindheid was vir elke Errie en die Errie-personeel ‘n inspirasie.
Ermelo was in haar grootwordjare haar tuiste, en dit is hier waar haar wortels diep lê. Soos die akkerbome op die terrein, is Shareen ook ‘n onlosmaaklike deel van die Erries.
Vanaf die Erries se kant wens die Erries die volgende vir Anna-Marie en Shareen toe:
Mag die pad voor jou gelyk raak,
mag die wind van agter waai
mag die son op jou gesig wees,
en milde reën jou veld besaai
en tot ons weer ontmoet,
mag God jou in die palm
van Sy Hand bewaar.
Eenmaal ‘n Errie, altyd ‘n Errie. Mag julle toekomspaaie geseënd en voorspoedig wees en mag julle harte altyd Errie-groen klop!
