schoolsthatrockOp Maandag 17 Junie om 20:00 staan drie Hoërskool Ermelo-onderwysers en 13 kinders op die lughawe, opgewonde, benoud, en meer as gereed vir die langverwagte avontuur na Rusland. Na twee vlugte en 13 lang ure in die lug, land die groep in Moskou: massief, mooi, met baie magiese elemente. Die strate is skoon, mense loop sonder vrees en die verkeer is georganiseerde chaos.
EHS se leerders was drie dae in Moskou waartydens hulle twee aanskoulike parke, ‘n kunsmuseum, verskeie katedrale, gedenkgeboue, insluitend die Kremlin, Rooiplein en ‘n Arsenaalmuseum, asook Rusland se Ruimtevaart-museum besoek het. Hulle het na hartelus gekoop by die duurste inkopiesentrum in Rusland (GUM), ‘n kleurryke vlooimark en verskeie aandenkingwinkels.
Met die ondergrondse treine het hulle die indrukwekkende treinstasies verken en met ‘n riviervaart Moskou vanuit ‘n ander oogpunt beskou. Die Erries sluit die reis aan Moskou op ‘n hoogtepunt af met ‘n besoek aan die Moskousirkus en ‘n oornagse treinrit na St. Petersburg.
Na die besige en gejaagde ervaring in die stad van Moskou, is St Petersburg `n lafenis vir die plattelandse leerders en onderwysers. St Petersburg is meer intiem, kunssinnig en aansienlik koeler as Moskou. Hier besoek die Erries majestueuse paleise (Pushkin paleis en Peterhof) en die Baltiese see. “By Peterhof het `n straat-orkes aan ons hartsnare gepluk met die speel van ons land se volkslied,” sê ‘n leerder van EHS.
Hulle het die wêreldbekende kunsmuseum, die Hermitage, en die “Spilled blood”-katedraal besoek. Albei die besoeke was onbeskryflik! Met ‘n kanaalvaart besef die Erries dat St Petersburg eintlik uit verskillende eilande bestaan.
EHS se leerders was bevoorreg om tydens die besoek aan St Petersburg Rusland se jaarlikse skoolverlatersfunksie, Scarlet sails, op die Neva-rivier te beleef. Laastens is die avonturier binne elkeen gevoed deur `n besoek aan die Divo Ostrov Pretpark en die alombekende en vreesaanjaende “Maze of fear”.
Die tien dae in Rusland het te vinnig verby gevlieg vir die EHS-leerders en -onderwysers. Rusland is `n asemrowende en verfrissende land met `n ryk kultuur, tradisie en geskiedenis.
Die Erries het vir maande na dié verkenningstog uitgesien, maar hul lewens is verryk met ongelooflike foto’s en onvergeetlike herinneringe.
Become a Sponsor
