schoolsthatrock
Amy Fröhlich verslind boeke. Amy Fröhlich, ’n Graad 12-leerder, VRL-lid, toptien kandidaat en eerstespan-netbalspeler, vind tussendeur ook nog tyd om ’n spul leesboeke deur te draf.
Sy het in 2023 nie minder nie as 115 boeke gelees. Sy het dus gemiddeld elke derde of vierde dag met ‘n nuwe een begin. Dít terwyl sy ongeveer tien uur per week netbal geoefen het én sy tweede in haar graad in akademie gestaan het.
Sy het teen begin Mei “net” 18 boeke vanjaar gelees, want sê sy ervaar matriek besiger as vorige jare.
Die leesgogga het haar in Graad 10 gebyt toe sy vir ’n paar maande siek was en nie kon netbal speel nie. Sy sê lees het definitief haar woordeskat uitgebrei wat handig in haar skryfstukke te pas kom.
Haar gunsteling-skrywer is die Amerikaner Kiera Cass, meestal bekend vir haar reeks “The Selection”. Dís ook van Amy se gunsteling-boeke. Sy lees gewoonlik romantiese fiksie laataande op haar bed of in die paar minute wat sy tussendeur huiswerk en netbaloefening kan steel.
Amy se mikpunt is om ná skool Aktuariële of Wiskundige Wetenskappe te studeer. Dit is dus geen verrassing dat Wiskunde die vak is waarvan sy die meeste hou nie.
Haar hoofbron vir boeke is die aanlynbiblioteek Library Genesis. Sy vind e-boeke geriefliker om rond te dra, want sy is bang om hardebandboeke te beskadig.
Amy wil nie eendag self boeke skryf nie en geniet lees net as ontspanningsaktiwiteit. Sy en haar sussie bespreek graag boeke wat hulle albei gelees het. – Deur Eunice Cilliers (Vooruit-redaksie)
Meer skolenuus: https://schoolsthatrocksa.co.za
Foto verskaf
All reactions:
230230
Become a Sponsor
