schoolsthatrock
Akademiese Uitnemendheid. Hoërskool Brandwag, Uitenhage, het weer bewys hoekom hulle as ’n bakermat van akademiese uitnemendheid beskou word. Dit is bewys vanjaar toe Lourens Preller, ’n uitstaande leerder, Brandwag se naam hoog gehou het. Tydens die Senior Afrikaanse Olimpiade vir Afrikaans Huistaal, het Lourens Preller, Hoërskool Brandwag se naam in die nasionale kollig geplaas.
Lourens, ’n graad 12-leerling met ’n onmiskenbare passie vir taal en leer, het die eerste posisie in die Oos-Kaap behaal. Dit is ’n prestasie van akademiese uitnemendheid, wat slegs aan die mees taalvaardige leerlinge in die provinsie voorbehou is. Sy talent strek veel verder. Lourens het ook die top 100 in Suid-Afrika gehaal. Hy deel die gesamentlike sesde plek met ’n handjievol akademiese reuse van regoor die land.
Meer as net Afrikaans…
Hierdie prestasie is geen eendag se vlieg nie. Lourens is tans nommer 1 op Hoërskool Brandwag se graad 12 akademie top 10. Dit is ’n rangorde wat die skool se briljantste presteerders uitlig. Dit beteken hy blink nie net uit in taal nie, maar handhaaf ’n algehele akademiese standaard wat van hom ’n rolmodel maak vir sy mede-leerlinge.
Boonop het Lourens onlangs deurgedring na die derde rondte van die Wiskunde Olimpiade. Dié kompetisie vereis logiese denke, probleemoplossing en ’n flinke wiskundige brein, eienskappe wat Lourens duidelik met gemak aanwend.
Meer as ’n Leerder – ’n Leier
Onderwysers beskryf Lourens as iemand met ’n vasberadenheid, nederigheid en toewyding wat hom nie net ’n akademiese ster maak nie, maar ook tot ’n inspirerende figuur in die klaskamer. Sy werksetiek en liefde vir leer straal deur in alles wat hy aanpak.
Skooltrots en Toekomsdrome
Die skoolgemeenskap is uiters trots op Lourens se prestasies. Volgens een van die onderwysers aan Hoërskool Brandwag, is dit “’n vreugde om ’n leerder soos Lourens te sien groei en presteer. Hy dra nie net die skool se naam met waardigheid nie, maar inspireer ook ander om hul potensiaal te bereik.”
Met sulke uitsonderlike meriete is daar geen twyfel dat die toekoms vir Lourens blink nie, of dit nou in taal, wetenskap, of ’n ander akademiese rigting is. Hy het gewys dat toewyding en passie werklik vrugte afwerp.
Meer skolenuus: https://schoolsthatrock.co.za/
Foto voorsien
Become a Sponsor
