schoolsthatrock
SA Schools XCO. Hoërskool Charlie Hofmeyr maak geskiedenis by SA Schools XCO.
Jeandré Gerber, leerling van Charlie Hofmeyr, het sy naam in Charlies-geskiedenisboeke geskryf toe hy vir die eerste keer aan die SA Schools Cross-Country Olympic (XCO) in Devonbosch deelgeneem het. Hy is die eerste leerder van Hoërskool Charlie Hofmeyr wat die skool by hierdie nasionale bergfiets-kompetisie verteenwoordig.
XCO is ’n Olimpiese formaat van bergfietsry waar deelnemers verskeie rondtes van ’n uitdagende baan voltooi. Die roete bestaan uit ’n kombinasie van steil klimme, vinnige afdraandes en tegniese gedeeltes wat uithouvermoë, spoed én vaardigheid op die fiets vereis.
Omdat daar geen vorige rekord van deelname deur die skool was nie, moes Jeandré heel agter in die wegspringposisie begin. Ten spyte hiervan het hy met groot vasberadenheid teen sterk kompetisie van topskole soos Paul Roos Gymnasium, Paarl Boys High School en Stellenberg High School meegeding.
In die Junior Mans o.18–o.19 kategorie, met ’n veld van 29 ryers, het Jeandré ’n uitmuntende prestasie gelewer. Na ’n intense, kop-aan-kop eindstryd het hy ’n 12de plek behaal met ’n indrukwekkende gemiddelde spoed van 25.9 km/h.
Hierdie prestasie is nie net ’n persoonlike triomf nie, maar ook ’n belangrike mylpaal vir Hoërskool Charlie Hofmeyr. Dit is die begin van ’n trotse nuwe hoofstuk in die skool se betrokkenheid by SA Schools bergfietsry.
Baie geluk, Jeandré! Jou deursettingsvermoë en prestasie inspireer die hele skoolgemeenskap.
Lees meer uitstaande skolenuus hier: https://schoolsthatrock.co.za/
Foto verskaf
Become a Sponsor
