schoolsthatrock
Dansende Kampioen-Dogters – Twee talentvolle dogters van Hoër Meisieskool Oranje het onlangs internasionaal geskitter op die wêreldverhoog van dans. Tholoane Mabope, ‘n graad 8-leerling, behaal ‘n indrukwekkende 3de plek in die o.16-afdeling. Vyf en vyftig deelnemers het aan die “World Championship Street Dance” deelgeneem in Engeland. Die kompetisie het die wêreld se beste jong dansers bymekaar gebring. Tholoane se energieke en tegnies-uitmuntende vertoning het haar tot bo aan die ranglys laat styg.
Asof dit nog nie genoeg was nie, was sy ook deel van die “adult championship formation” span. Hulle is uiteindelik as wêreldkampioene gekroon. Hierdie spanitem het gepryk met ‘n hoë vlak van samehorigheid en stylvolle choreografie, ‘n ware dansspektakel.
Disko-wêreldkampioenskap in Pole
Aan die ander kant van Europa het Letitia de Smidt, ook in graad 8 by Oranje, haar merk gemaak. Sy het deelgeneem aan die Disko-wêreldkampioenskap in Pole. Sy het die beste onder die Suid-Afrikaanse deelnemers gevaar, en het algeheel 9de geëindig in ‘n uiters kompeterende veld. Haar teenwoordigheid en ritmiese presisie het beoordelaars beïndruk en getuig van haar harde werk en talent.
Die Disko-wêreldkampioenskap span het met 22 medaljes teruggekeer van die kompetisie in Pole. Die jong dansers het hul sukses toegeskryf aan spanwerk en toewyding, en die spangees was glo ongelooflik.
Hierdie twee Dansende Kampioen-Dogters het nie net hul eie vermoë bewys nie maar ook hul skool se naam met trots in die wêreld laat weerklink. Die prestasies van Tholoane en Letitia is ‘n inspirasie vir jong dansers oral. Dit wys dat met toewyding, oefening en passie, enige verhoog bereikbaar is.
Meer skolenuus: https://schoolsthatrock.co.za/
Foto voorsien
Sponsored By
