schoolsthatrock
Totsiens Hannes Oosthuizen. Met diepe dankbaarheid en groot waardering neem Hoërskool Witteberg, Bethlehem, afskeid van hul geliefde skoolhoof, Mnr. Hannes Oosthuizen.
Hy het in 2009 sy reis by Witteberg begin, in 2020 as waarnemende skoolhoof gedien, en in 2021 amptelik die leisels oorgeneem. Sedertdien het hy met bewonderenswaardige integriteit, onwrikbare geloof en buitengewone toewyding die skool met hart, visie en hoop gelei.
Mnr. Oosthuizen is ’n leier wat nooit vra dat iemand iets doen wat hy nie self bereid was om te doen nie. Sy onvermoeide werk en vasberadenheid het Witteberg vorentoe geneem. Die doel was om elke leerder en personeellid in ’n omgewing van groei, stabiliteit en trots te laat floreer.
Mylpale onder sy leiding
- Tweede agtereenvolgende oorwinning in die Derby
- Die grootste leerdertal in die skool se geskiedenis
- Uitbreiding van die koshuise
- Versterking van Witteberg as ’n top akademiese, sport- én kultuurskool
Hy het elke personeellid en leerder met respek, waardigheid en menslikheid behandel. Sy geliefde uitdrukking, “’n billike versoek was nooit onbillik nie”, sal nog lank in ons gange weerklink. Dit was nie net woorde nie, maar ’n lewenswyse. Dit was ’n manier van lei – wat almal diep geraak het.
Met swaar harte, maar ook met groot dankbaarheid, sê Witteberg totsiens, Mnr. Oosthuizen. “Dankie vir u nalatenskap van geloof, moed, integriteit en hoop. Dankie dat u ons gehelp het om te groei – as skool, as personeel en as jongmense.”
“Ons wens u voorspoed, vrede en seën toe vir die nuwe paaie wat voorlê. Mag u volgende reis net so ryk, betekenisvol en vervullend wees soos die jare wat u by Witteberg spandeer het.”
“Meneer sal altyd deel bly van die Witteberg-familie.“
Lees meer skolenuus hier: https://schoolsthatrock.co.za/
Foto verskaf
Become a Sponsor
