Netbal Kapteins. In ons reeks oor sport kapteins, gesels Schools That Rock vandag met Kaylin Badenhorst. Kaylin is die kaptein van Hoërskool Noord-Kaap, Kimberley, se 1ste netbalspan. Sy teken vandag die negende doel aan in ons reeks oor Netbal Kapteins van hoërskole in Suid-Afrika.
“Ek het in graad 2, op die ouderdom van 8, begin netbal speel. Ek is passievol oor my netbal en geniet dit om die sport te speel. Dit is ‘n goeie spansport en ‘n geleentheid om nuwe mense te ontmoet. Ek doen ook ‘bodybuilding’. Ek speel tans hoof-verdediger. In die learskool het ek gewissel tussen hoof-verdediger en hoof-doel. Ek was ook al voorheen kaptein.
Ons span oefen drie keer per week. Ek oefen elke oggend saam met my ma in die ‘gym’ waar ons verskillende oefeninge doen.
Die netbal wedstryd waar ek die meeste gestres het, was in die learskool. Ons het uitgespeel vir 1ste en 2de posisie in die toernooi en ons het gewen met 1 punt!
My korttermyn netbal-doelwit vir die volgende jaar is om vir die GWK onder-18 span te speel. Dit kan ook vir my die geleentheid bied om vir die SA onder-21 span te speel.
My top vyf prioriteite tans in my lewe is: God, familie, my gesondheid, akademie, sport.
Netbal op universiteit
Ja, ek wil graag voortgaan met netbal na skool. Ek wil op universiteit netbal speel. Die Proteas is ook op my lys! In die eerste drie jaar van professionele netbal sal ek graag my plek in die SA wil behou, deur die wereld reis en in die Netbal Worldcup speel.
Enige tekortkominge in my spel? Ek dink nie ek het tekortkominge in my spel nie, maar daar is altyd plek om te verbeter in my fiksheid en ‘skills’. My sterk punte in netbal – ek dink my kommunikasie op en van die baan is baie goed. As netbal kaptein weet ek hoe om leiding te neem sonder om lelik te wees met die meisies.
Ja, ek het ander belangstellings buiten netbal. Ek hou van teken en boeklees in my vrye tyd en ek geniet dit om te ‘gym’.
As netbal kaptein hou ek my span gemotiveerd deur gereeld vir hulle klein geskenkies, soos ‘n sjokolade, te gee. Ons hou ook gereeld spanpraatjies waarin ons goeie eienskappe in mekaar uitken, “game plans” beplan en mekaar beter leer ken.
As rolmodel, sien ek op na Tannie Elsje. Selfs in die moeilike tyd het sy altyd ‘n glimlag op haar gesig.
Grootste uitdaging
Ek dink die grootste uitdaging van die meeste deelnemers aan sport vandag is die Covid-19 pandemie. Deur die ‘lockdown’ kon baie spelers glad-nie oefen nie en al die toernooie was afgestel.
Hoe bestuur jy jou sport-, akademiese en ander verpligtinge? Hoe lyk jou daaglikse roetine? Ek het ‘n vaste roetine wat ek daagliks volg. Die roetine voorsien aan al my verantwoordelikhede. Daarvolgens kan ek voeldoende tyd aan alles spandeer. Ek luister na my lyf en rus wanneer ek moet. Ek hou van ‘n gestruktureerde leefstyl en dus doen ek alles op tyd.
My grootste netbal-nagmerrie is dat een van die meisies seerkry tydens ‘n wedstryd.
Wat ek omtrent spanwerk geleer sedert ek kaptein geword het, is dat netbal ‘n spansport is. Ek kan nie net aan myself dink nie. As daar ‘n meisie is wat moeg is of ‘n afdag het, moet ek haar dra en optel deur die moeilike tyd.
Hoogtepunte
Die hoogtepunte wat ek beleef het in netbal as speler en as kaptein sover, is om te sien hoe ons groei as ‘n span. Ook dat al die meisies goed oor die weg kom en mekaar ondersteun.
My lekkerste wedstryd wat ek ooit gespeel het, was op ons Mosselbaai-toer. Ons het die wedstryd gespeel met ‘n glimlag op ons gesigte. As iemand ‘n fout gemaak het, het ons almal daaraan gewerk om dit reg te maak.
‘n Voorstel van my wat vir die span goed werk, is kommunikasie. Ek het ‘n reël gemaak in die span dat, as iemand ongelukkig is, hulle nie twee keer moet dink om met die span te praat nie. Voordat enigiets ‘n probleem raak, praat ons dit uit.
Wanneer ek sien dat een van my spanlede sukkel met nuwe uitdagings in die spel, sal ek na oefening na haar toe gaan en vir haar vra waarmee sy sukkel. Dan sal ek haar daarmee help.
Die beste advies wat ek van my afrigter ontvang het, is dat jou gedagtes jou toekoms bepaal. ‘n Bekwame afrigter, volgens my, is liefdevol, toegewyd en loop die ektra tree vir haar span.
My afrigter en spanlede beskryf my as toegwyd en hardwerkend.
Karla Pretorius
Die professionele netbalspeler met wie ek graag sal wil koffie drink, is Karla Pretorius. Sy speel my posisie en sy is ook ‘n dieetkundige, waarvoor ek ook gaan swot. Ek sou met haar wil praat oor hoe sy gaan swot het en nog steeds goeie netbal kon speel.
Wat my die gelukkigste in die lewe maak is om my familie en vriende gelukkig te sien en ‘n glimlag op iemand se gesig te sit.
My grootste hoogtepunt die afgelope vyf jaar was om weer netbal te speel na die Covid pandemie.
As ek myself in een woord moet beskryf, sal dit wees: gelukkig.“
Meer skolenuus: https://schoolsthatrock.co.za
