schoolsthatrock
Morné Odendaal se terugkeer – Hoër Meisieskool Oranje verwelkom met groot opgewondenheid die terugkeer van Morné Odendaal. Hy keer terug na Oranje, as hoofafrigter van die o.18A-hokkiespan. Ná ’n afwesigheid van meer as drie jaar, is Morné Odendaal se terugkeer met visie, ervaring en ’n wenkultuur. Hy bring nie net sy bekende passie terug nie, maar ook ’n bewese rekord van uitnemendheid.
Odendaal het die span van 2013 tot 2022 afgerig en in daardie tyd ’n verstommende wenpersentasie van 96,1% oor 400 wedstryde behaal. Onder sy leiding het Oranje jaar ná jaar die nommer een posisie op die nasionale ranglys beklee. Dit is ’n prestasie wat min skole kan ewenaar.
Na sy vertrek het hy na die VSA verhuis. Later het hy die o.18A-span van St Anne’s oorgeneem. Toe hy in 2023 daar begin het, was die span 60ste op die SA-ranglys. Binne twee seisoene het hy hulle tot 11de en toe 12de laat klim. Dit is ’n bewys van sy vermoë om spanne te transformeer.
Hy vertel dat hy kinderlik opgewonde is om weer deel te wees van Oranje se hokkiefamilie. Sy afrigtingstyl is gegrond op beginsels en waardes. Morné glo daarin om elke speler te help groei, nie net op die veld nie, maar ook as mens. Sy doel is om ’n spanomgewing te skep waar prestasie en plesier saam bestaan, en waar elke kind se unieke potensiaal ontsluit word.
Sy terugkeer beteken nie net ’n herlewing van ’n suksesvolle era nie, maar ook ’n geleentheid vir nuwe groei en ontwikkeling. Oranje se hokkieprogram staan bekend vir sy hoë standaarde, en met Morné aan die stuur word dié nalatenskap voortgesit.
Gyster van Schalkwyk, die huidige afrigter van die o.18A-span, bly ’n waardevolle deel van die afrigtingspan en sal voortgaan om ’n sleutelrol in Oranje se hokkiestruktuur te speel.
Meer skolenuus: https://schoolsthatrock.co.za/
Foto voorsien
Become a Sponsor
