Jaarlikse Derby - Hoërskool Witteberg teen BVHS

Jaarlikse Derby. Een dorp, twee skole – goeie gees! Dit is dié geleentheid op Bethlehem se skolesportkalender. Dit was weer tyd was weer tyd vir die jaarlikse Derby in Bethlehem. Dit is wanneer Hoërskool Witteberg en Bethlehem Voortrekker Hoërskool mekaar op die rugby-, hokkieveld, en netbalbaan die stryd aansê.

Saterdag 31 Mei het die gasheerskool, Hoërskool Witteberg, se eerste rugbyspan vir die tweede agtereenvolgende jaar as die wenners uit die stryd getree. Dit was ‘n naelbytoorwinning van 34-33.

Voor die groot dag was mnr. Hannes Oosthuizen, skoolhoof van Witteberg, se woorde:

“Wat ‘n voorreg is dit nie om hierdie spesiale dag met die Bethlehem-gemeenskap te kan deel nie.

“Die dag is gewoonlik vol opwinding en genot. Aan die een kant is dit ook senutergend en spesiaal. Dit laat jou huil en laat jou lag. Dit duur ook vir ewig en is soms in ’n oogwink verby. Hierdie dag is ‘n dag wat jou toets en jou soms troef. Maar ook ’n dag vol trots. Dit is aan die ander kant ook net ’n gewone dag met ongelooflike geskiedenis en genade.

Alles in ons dorp

“Ons vertrou ook dat elke ondersteuner op die dag net weer die mooi en besondere van ons gemeenskap sal beleef. Dat ons te midde van alles in ons dorp, weer kan trots wees op wie ons is wat ons kan vermag. Dat ons vriende is en mekaar kan ondersteun ongeag die uitslae van die lewe. Ons skole sou nooit die bakens van hoop kon wees as ons nie die ondersteuning van die gemeenskap gehad het nie. Dié naweek se vertoonvenster is dus ’n bitter mooi prent te danke aan julle besteding in ons.

“Mag elkeen wat die dag bywoon, saam juig en ontspan. Mag jul wonderlike sportmangees beleef en sien hoe elke skool se leerders met trots aantree vir elke stryd. Dankie aan elke afrigter, beampte, skeidsregter, noodhelper en speler wat die dag moontlik maak. Elkeen het ’n enorme aandeel aan dit wat ons dorp se derby so uniek maak.

“En wanneer die son sak na die laaste verrigtinge, mag ons mekaar omarm in die wete dat alles net ‘n geskenk van Bo is.”

En nou, met die afwagting, opwinding en harde werk agter die rug, kan Bethlehem terugkyk op nog ‘n suksesvolle Derby en met dankbaarheid mnr. Hannes se woorde beaam . . .

Seuns-hokkie

Vir ‘n tweede agtereenvolgende jaar is Hoërskool Witteberg se 1ste Seunshokkiespan ook as Derbywenners gekroon! Na ‘n naelbyt “8 seconds” is hierdie die oomblik toe die wen gevier was!