schoolsthatrockDie Ermelo-streekskompetisie van die ATKV-Tienertoneel is vanjaar weereens in die Ouditorium van Hoërskool Ermelo aangebied. 16 Toneelgroepe het vanaf Dinsdag 31 Julie tot Vrydag 3 Augustus opgetree. Op Saterdag 4 Augustus het die top vier produksies in die streeksfinaal meegeding.
Hoërskool Ermelo het twee toneelstukke ingeskryf – Meisiekoshuis en Update. Albei is geskryf deur Gustav Pöhl en het bronssertifikate ontvang vir die nuutgeskrewe teks. Me. Lizanne Dippenaar was die regisseur van Update. Die stuk handel oor sosiale media wat ‘n groot rol in die lewens van tieners speel. Die karakter Kevin manipuleer al sy vriende se sosiale media-profiele totdat hy aan die einde kry wat hy graag wil hê – niemand anders nie as die beeldskone Jenny.
Luhan Meyer, GJ Swart, Junicke Broekman, Aloné Arnoldi en Rikus Cilliers ontvang elkeen ‘n bronssertifikaat vir hulle spel en die stuk ontvang ‘n bronssertifikaat vir kostuums. Meisieskoshuis, ook ‘n EHS-stuk onder leiding van Me. Mariana de Jager, behaal ‘n besondere derde plek in die streeksfinaal! Die klug is tipies van wat gebeur tydens groentjieskonserte.
Die onderskeie koshuise sal enige iets doen om te wen – selfs die teks van die ander koshuis steel! Die Grotseuns en Paddatjies (graad 8-seuns en –dogters) staan verstom oor al die koshuis-manewales terwyl die matrieks allerhande stuitige planne beraam. Juffrou Walter en meneer Visser (koshuisouers) sorg ook vir ‘n paar komiese oomblikke.
Sharné en Ashton du Plessis kwyt hul uitstekend van hul taak as klank- en beligtingoperateurs.
Meisieskoshuis ontvang bronssertifikate vir regie, kostuums en stelontwerp. Bronssertifikate word ook toegeken aan Nicole Smith, Theané Arnoldi, Charis Brundyn en Nicole Venter vir ensemble. Zelné de Jager, Baruch Büchling, Gejhan Thyssen, Tjaart Eloff, Zara Büchling, Dané Thirion en Desmond Slabberts ontvang elkeen ook bronssertifikate vir ensemble en spel. Vandré Swart spog met ‘n silwersertifikaat vir sy toneelspel.
Gedurende die week het Wilhelm van der Walt en Nico Scheepers as beoordelaars opgetree en Saterdagaand het Cintaine Schutte en Vianney Farmer by Nico aangesluit.
Baie geluk aan hierdie Erries wat uitgeblink het op die verhoog.
EHS is werklik baie trots op elkeen van julle.
