schoolsthatrockOp Vrydag, 17 Augustus, het Hoërskool Cradock, saam met 15 ander skole, aan die ATKV & Burger se jaarlikse Vlymskerp Vasvrakompetisie deelgeneem by Laerskool Sunridge in Port Elizabeth.
Skole wat deelgeneem het, sluit o.a. in: Hoërskool Pearson,Hoërskool van Kirkwood, Hoër Volkskool, Hoërskool Andrew Rabie, Hoërskool Gelvandale, Gill College, Hoërskool DF Malherbe, Hoërskool Framesby, Hoërskool PJ.Olivier, Hoërskool Otto du Plessis, Hoërskool Bethelsdorp, Hoër Landbouskool Marlow, Hoërskool Nico Malan en Hoërskool Daniël Pienaar. Elke skool het `n span van 4 leerders ingeskryf.
Die vasvra het bestaan uit `n kombinasie van geskrewe en mondelinge vrae. Na voltooiing van `n skriftelike toets, is elke span onderwerp aan `n snelvuurafdeling waartydens hulle binne `n gegewe tyd `n aantal vrae moes beantwoord.
Na afloop hiervan is 9 spanne deur na die halfeindronde en elke span moes van nuuts af punte bymekaar maak.
Skole is per trekking in 3 groepe van 3 skole elk verdeel en moes hul flinke denke toon deur die gonser te druk voor hul `n vraag kon beantwoord. Die spanning het hoog geloop en die kompetisie was sterk.
Uiteindelik het drie skole teen mekaar te staan gekom in die finale ronde. CHS het hier sterk na vore getree en met selfvertroue oorheers en as ware wenners uit die stryd getree.
Groot pryse is gewen: Elke spanlid het R1200 kontant ontvang en die skool R5000 kontant. Die skool ontvang ook advertensieruimte in Die Burger ter waarde van R10 000 asook subskripsie vir 3 maande by Netwerk 24.
Hoërskool Cradock is baie trots op hierdie Kwaggas! Die lang ure se oefening is nou beloon. Geluk ook aan mev. Elsabe van der Merwe wat hierdie leerders help voorberei het vir hierdie kompetisie. NIL NISI NITENDO!
Foto bo: CHS-leerders die slimste van die slimstes! Hoërskool Cradock het die afgelope naweek die ATKV & Burger se Vlymskerp Vasvrakompetisie gewen.
Vlnr: Dirkie Cronje, Shané de Waal, Rozelma van der Merwe, Pieter-Ben Smit
Become a Sponsor
