Oranje Meisieskool. Wat ‘n kwartaal! Kwartaal 2 van 2022 was ’n besonderse een vir Oranje Meisieskool op vele terreine. Oranje is nederig, dankbaar en baie geseënd. Van die hoogtepunte (in numeriese volgorde):

Liné Greyling het die o.18-enkelspeltitel op die nasionale junior tenniskampioenskap verower. Donna le Roux was die o.16-naaswenner.
Die o.18A-hokkiespan is weer die St. Mary-toernooiwenners, die 6de keer uit die laaste 7. Die span was onoorwonne in 12 wedstryde en het net in 1 kragmeting ’n doel afgestaan.
Vyf redenaars kwalifiseer vir die nasionale rondte van die Radikale Redenaars en 1 vir die Oppie Tong Af.
Roline Louw word die nasionale o.18-kampioen in heptathlon (7-kamp) in die 1ste jaar wat sy dit beoefen.
Die o.16A-hokkiespan het die JF/SPAR-toernooi gewen. 17 doele is behaal en 0 afgestaan.
OMS se 1ste netbalspan het Sentraal se Standard Bank-toernooi onoorwonne afgesluit deur Helpmekaar Kollege in die eindstryd met 17-12 te klop. Die span staan nou op 41 seges uit 44 wedstryde.

Amanda Coetzer-tennistoernooi

OMS se 1ste tennisspan is die nie-amptelike SA-kampioen nadat hy Bloemhof in die eindstryd van die ITEC Amanda Coetzer-tennistoernooi met 5-1 geklop het en het dié trofee die 1ste keer sedert 2018 verower.
Die 1ste netbalspan het in Pretoria vir Affies, ongetwyfeld SA se toonaangewende netbalskool, die 1ste keer in 11 jaar met 31-26 geklop. Dít nadat die span ná 1ste kwart met 5-12 agter was.
Drie OMS 1ste spanne is gelyktydig in die top-3 in die land. Die hokkiespan beklee die nr. 1-posisie op die SA-ranglys en die netbalspan nr. 3. Al is daar nie ’n tennisranglys nie, is OMS sonder twyfel die nr. 1-meisiespan en nog onoorwonne.
Die Oranje-koor, as 1 van net 2 uit die Vrystaat, dring deur na nasionale eindronde van ATKV-Applous.
Vier leerders word vir die SA-span na die Biathle- en Triathle-wêreldkampioenskappe gekies. Danielle Joubert is die SA o.19-wenner in albei.
Die 5 A-netbalspanne sorg vir geskiedenis deur vir die 1ste keer almal in die top-2 in die Vrystaat te eindig, met 4 die provinsiale kampioen.
Drie dansers haal die SA-span na die Wêreldkampioenskappe in freestyle.
Nege swemmers is in die top-10 van ’n item in hul ouderdomsgroep op die SA-ranglys. In 6 gevalle is hul in die top-5.