schoolsthatrock
Hoërskool Upington se krieketspan het Saterdag, 5 November 2016, teen Carltonians in die laaste rondte van die 40 beurt dagliga gespeel op 8 SAI.
Carltonians wen die loot en besluit om eerste te kolf. Altwee spanne was vas berade om ‘n goeie vertoning te lewer. Carltonians se openingskolwers Luciano Anthony en Reynald Isaacs, het elke bal wat Uppies na hul kant toe gestuur het weg van die paaltjies gehou, vir 12 boulbeurte en teken ‘n openings-vennootskap van 58 lopies aan.
‘n Goeie draaibal wat indraai vanaf die kolfblad klop die kolf van Luciano en tref sy beenskutte waar hy uitgegee word deur die skeidsregter. Reynald word verder bygestaan deur Curtley Titus. Curtley vervul sy rol baie goed om Reynald toe te laat om die boulwerk te trotseer. Reynald maak ‘n oordeelsfout en word agter gestonk deur die paaltjiewagter. Hy slaan ‘n uitstekende 70 lopies.
Nakkie Duvenhage neem 6 paaltjies. Elke kolwer wat inkom dra by tot ‘n verdedigbare totaal van 153 lopies op ‘n baie moeilike kolfblad, waar die bal baie goed gespeel moet word om lopies aan te teken.
Uppies kolf volgende en daar kan gesien word dat alhoewel die telling min klink vir ‘n 40 boulbeurt wedstryd, gaan dit nie maklik wees om die lopies aan te teken nie. Die openingskolwers lyk baie ongemaklik in die eerste paar boulbeurte en Dian Kapp word uitgevang na ‘n goeie derdebal van Donovan Jaarts. Uppies word verder geteister met uitstekende openingsboulwerk vanaf Donovan, Johnathan Verwant en later Luciano Anthony.
Nakkie Duvenhage veg ‘n verbete stryd en word eers op die grens misgevang. Dit het die aanval egter nie laat steier nie en hy is ‘n paar balle daarna uitgevang met 24 lopies. Daarna kantel die paaltjies kort-kort en Uppies is diep in die moeilikheid met slegs 46 lopies na 19 boulbeurte. Luciano neem 4 paaltjies en staan slegs 37 lopies af in 8 beurte. Johnathan neem 2 paaltjies vir 25 na 8 beurte. Die kolwers sukkel om deur die veldwerkers te kom en die lopies bly laag per boulbeurt.
Benré Engelbrecht en Mason Zacharia is op die kolfblad as no 7 en 8 kolwers en begin vasskop. Mason bly en teken 20 lopies aan en word uitgevang met ‘n bal van Johnathan. Henco Kotze word ingestuur en draai die aanval aanhoudend na Benré se kant wat lyk asof hy sy kolf oë ingepak het, want hy mis nie ‘n bal nie.
Dit was ‘n uitmuntende vertoning deur Benré om so laag op die rangorde in te kom en elke bal wat na sy kant toe kom met meriete te hanteer. Goeie balle is met respek hanteer en die swakker bal wat, nie gereeld gekom het nie, het lopies beteken. Hy slaan die wenlopies in die 34ste beurt met ‘n trekhou wat vir ‘n 4 oor die grens seil.
Hierdie wedstryd was ‘n naelbyter wat enige kant toe kon geval het. Uppies wen met 4 paaltjies en Benré word gekies as speler van die wedstryd.
Op die foto bo:
Voor: Bobby Duvenhage; Steven Smith; Lemley Mulder
Agter: Giovanni lategan; Dian Kapp; HencoKotze; BenréEngelbrecht; Mason Zacharia; NakkieDuvenhage; Ian Erasmus
Become a Sponsor
