Hokkie Kapteins. In ons reeks oor sport kapteins, gesels Schools That Rock vandag met Tanya Smit. Tanya is die kaptein van Langenhoven Gimnasium in Oudtshoorn se 1ste meisies hokkiespan. Sy teken vandag die vier-en-dertigste doel aan in ons reeks oor Hokkie Kapteins van hoërskole in Suid-Afrika.
“Ek het in graad 4 begin hokkie speel. Ek was toe tien jaar oud. My pa het van kleins af al aan my en my sussie gekarring om hokkie te speel, maar ons het altyd gesê dis ‘n ‘seuntjie-sport’. Karla, my tweeling sussie, het toe uiteindelik besluit om dit uit te probeer. Ek het eers die kat uit die boom gekyk, maar na ‘n jaar het ek gesien hoe baie sy dit geniet en ek het toe besluit om ook te begin. Die gogga het dadelik gebyt. Ek hou van hokkie omdat dit ‘n spansport is en omdat dit taktiek vereis.
Gunsteling hokkiespeler
My gunsteling professionele hokkie speler is Eva de Goede van Nederland. Ek bewonder haar vermoë om haar span op die baan te lei en dat sy al vier Olimpiese spele medaljes verower het.
Tans speel ek ‘center-back’. Ek het begin op ‘sweeper’ en toe daarna nog net ‘center-back’ gespeel.
Ek was die eerste keer as gesamentlike kaptein verkies in graad 7. Dit was saam met Anika Otto, wat tans Hoërskool Punt van Mosselbaai se hokkie kaptein is. Ek glo die kaptein se grootste taak is om op en van die veld dieselfde eienskappe te handhaaf. Dit is om te lei deur ‘n voorbeeld en kalm te bly onder druk.
Ons span oefen drie keer per week. Ons afrigter glo sterk daaraan om voluit te oefen en dan een dag te rus. Ek het nie ‘n uitgewerkte oefenprogram vir myself nie, maar ek doen elke middag landloop. Ek glo dis ‘n manier om fiks te bly en dit is goed om ‘n mens se kop ‘n bietjie skoon te kry. Ons landloop Meneer is baie passievol en hy maak hardloop lekker!
Kwaliteite
Die kwaliteite waaroor ‘n hokkie speler moet beskik is om kalm te bly onder druk. Jy moet nooit opgee nie – nie as jy voorloop nie, en ook nie as jy agter is nie.
My sleutel tot sukses, as hokkie kaptein, op die hokkieveld, is dat ek my swak punte ken en probeer om om dit te verwerk. Ek is nie die vinnigste speler op die veld nie, maar ek kan die spel goed lees en interpreteer.
Wat my elke keer, wanneer ek op die hokkieveld stap inspireer, is dat ek dankbaar is vir ‘n gesonde liggaam en ek eer die Here daarvoor. Hy het ons hele span geseën met talente. Al wat ons kan doen, is om dit voluit uit te leef tot Eer van Sy naam. My motivering is om Sy lig op die baan uit te straal.
My lekkerste wedstryd in my loopbaan tot nou, was toe ons in 2021 teen Hoërskool Outeniqua van George gespeel het op ons nuut-geboude astro. Ons het hulle daardie dag met 1-0 geklop. Ons was so dankbaar om weer te kon speel na die inperkings en toe kon ons dit nog op so ‘n hoogtepunt ook begin.
Slegste wedstryd
My slegste wedstryd? Ek het my gedagtes só ingestel om nooit ‘n slegte wedstryd te hê nie. Dit help nie om negatief te wees nie. Ek gee altyd my beste, al doen ek nie altyd my beste nie. En ek het geleer dat dit goed genoeg is. Dit help nie om na perfeksie te streef nie, want dit gaan jou teleurstel. Ek streef eerder daarna om met ‘n gees van uitnemendheid te speel en daarom hoef ek nooit ‘n slegte wedstryd te hê nie. Die lewe is te kort om negatief te wees.
As hokkie kaptein hanteer ek druk tydens wedstryde deur diep asem te haal en die Here te dank vir die wonderlike geleentheid om te kan speel. Deur bewus te word van Sy teenwoordigheid rondom my, raak ek rustig en ervaar Sy bonatuurlike vrede.
Om my span te motiveer, bid ek voor elke wedstryd dat ons sal onthou om Sy Lig op die baan uit te straal en dat dit ons hoofdoelwit sal wees. Sukses is nie om altyd te wen nie, maar om jou beste te gee vir ons Hemelse Vader.
Top 5 prioriteite
My huidige top 5 prioriteite in die lewe, is my Geestelike lewe, akademie, oefen, eet en slaap.
My raad aan beginners in hokkie is om net die bal te vat en te gaan speel saam met jou maats, veral saam met mense wat beter is as jy. Deur jouself te omring met mense wat beter as jy is, lig hulle jou op sonder dat jy dit weet. Moet nooit opgee nie. “Practice makes perfect”.
Ek kyk nie eintlik hokkie op TV nie want ek sukkel om tyd te kry, alhoewel ek graag sou wou.
My korttermyn doelwit is dat ek graag na die Universiteit van Stellenbosch wil gaan en BRek studeer.
Verantwoordelikhede
Ek hanteer my verantwoordelikhede by hokkie saam met my sosiale en akademiese verantwoordelikhede deur behoorlike beplanning. Matriek is besig, maar dit is lekker om besig te wees. Dit is ‘n voorreg om aan alles te kan deelneem en dit is die laaste tyd van my lewe wat ek so gebalanseerd sal kan wees in alle aspekte van my lewe. Daarom gaan ek voluit vir alles wat ek aanpak.
Ja, ek sal graag vir my universiteit se koshuis wil hokkie speel, maar net vir sosiaal en om fiks te bly.
My grootste enkele hoogtepunt die afgelope vyf jaar, is definitief ons skool se VCSV (Kruispadkamp) in 2018 toe ek graad 8 was. Ek het vir die eerste keer regtig verstaan wat dit beteken om ‘n verhouding met die Here te hê. Ek is toe op 17 November 2019 gedoop.
Ander belangstellings
Ja, ek het ander belangstellings buiten hokkie. Ek is mal daaroor om langafstande te hardloop of om staproetes in die berge te doen. Ek is ook mal oor smaaklike kos en om na ‘n sonsopkoms te kyk.
Daar is ‘n hokkiespeler na wie ek opkyk, Helette. Sy was die eerstespan se hokkie kaptein toe ek in graad 8 was. Dit was die eerste keer wat ek vir die eerste span uitgehelp het. Sy het die vermoë gehad om altyd positief te bly en opbouend te wees. Sy was nooit afbrekend nie en ek streef daarna om ook so te wees.
Wat my die meeste opgewonde in die lewe maak, is om die vrugte van harde werk te pluk.
Die professionele hokkiespeler met wie ek graag wil koffie drink, is Eva de Goede.
Ek sal myself in een woord beskryf as taak-georienteerd.”
Meer skolenuus: https://schoolsthatrock.co.za
Foto’s verskaf