Amanda Coetzer Tennistoernooi. Oranje het vir die 1ste keer in die 25 jaar van die Itec Amanda Coetzer-tennistoernooi dit vir ‘n 3de keer agtereenvolgens gewen. OMS het die Hoër Meisieskool Paarl Saterdag 4-0 in die eindstryd geklop.

Vier tennisspelers van Sekondêre Meisieskool Oranje in Bloemfontein het geskitter tydens die Tennistoernooi die afgelope naweek. Donna le Roux, Mia Schimper, Nina Schimper en Ansoné Theron het hul derde Amanda Coetzer-titel (2022-2024) verower. So ook MC Olivier as afrigter.

Vantevore was Lize Moolman die enigste Oranjeniet wat drie keer (2012, 2013 en 2015) in ‘n wenspan was. Nog ‘n prestasie is behaal deur Ameli Bezuidenhout. Sy het die vierde speler in die toernooi se geskiedenis geword om die o.19-afdeling (2024) én o.15-afdeling (2023) te wen.

Oranje se o.15’s was die naaswenners. Die juniors het moedig geveg, maar het met 2-4 in die eindstryd teen Affies verloor. Drie van die 5 spanlede is nog in Graad 8 vanjaar.